REMATAMOS O TRIMESTRE

Un trimestre remata, e con el o ano.
Tivemos uns meses cheos de aprendizaxes e novidades.
Imos descansar para regresar con novos folgos.

CHOCOLATADA 2016

Chegou o día, remata o primeiro trimestre e como é tradición celebramos a gran chocolatada. Houbo movemento desde primeira hora da mañá. Nas nosas clases recolléronse as tarxetas e as árbores de Nadal...Xa quedaba menos!

Despois do recreo,todo estaba preparado e o alumnado de 6º encargouse de repartir o chocolate

acompañado de rosca. RIQUÍSIMO!!!

Tamén recibimos a visita do APALPADOR acompañado polo coro do cole.

FELICITACIÓN E TARXETAS DE NADAL

Os últimos días do trimestre estivemos moi atarefadas e atarefados rematando traballos. Como anunciamos nunha entrada anterior do blog, ademais da elaboración de tarxetas, preparamos entre o texto dunha tarxeta para as nosas familias e unha tarxeta para unha compañeira ou un compañeiro que faremos chegar nuns días ... a sorpresa está asegurada. 

Recordamos as partes dun texto-carta, fixemos un borrador na libreta, puxemos os datos no enderezo no sobre, averiguamos o custe do selo nas tarifas de correo. 

Agora toca esperar, falaremos dos resultados en xaneiro.

AS NOSAS ÁRBORES DE NADAL

Nos últimos días, nas sesións de Plástica preparamos un agasallo para decorar as nosas casas polo Nadal.



Precisamos:
- Piñas -conseguímolas dalgún veciño, dalgún avó, dalgún familiar...e ata compradas en bazar-
- Barro.
- Pintura acrílica: verde, dourada e vermella.
- Pompóns de cores.
E por suposto, moita ILUSIÓN e moita PACIENCIA.

Os resultados compensaron o noso esforzo:

OS CÍRCULOS DE KANDINSKY

 A partir da lectura do libro EL SONIDO DE LOS COLORES coñecimos algo máis sobre Kandinsky, precusor do arte abstracto. 

Nas sesións de Matemáticas e de Ed. artística falamos de círculos, radios, circunferencias, cordas...e despois de ver diferentes obras do autor e adaptacións inspiradas na súa obra, montamos de maneira cooperativa un taller de recortado con círculos de diferentes tamaños.

Practicamos diferentes combinacións coloridas de círculos concéntricos. 

Cadaquén recortou un tronco e combinando os círculos montamos "unha árbore de felicitación coas nosas árbores".  

O resultado está exposto no noso corredor do cole, pero podedes aprecialo nas seguintes imaxes:

VISITA DE DOUS XOGADORES DO PONTEVEDRA CF

       Hoxe dous xogadores do CF Pontevedra, Mario Barco e Javier Bonilla, achegáronse ao noso cole para contestar algunhas das nosas curiosidades, recibir ao noso entusiasmo por o equipo da cidade -que ademais celebra o seu 75 aniversario neste ano- e  achegarnos ao seu deporte. Quedou de manifesto que entre o noso alumnado hai unha grande afeción polo equipo local...

TARXETAS ARTÍSTICAS

Estes días deseñamos tarxetas moi especiais...queremos que sexan diferentes e buscamos inspiración. Vimos unha presentación na pantalla sobre "tarxetas con arte". A continuación, centramos a nosa atención na obra do pintor francés Henri Matisse. 

Limos a obra LAS TIJERAS DE MATISSE que causounos moita curiosidade e atopamos máis información... 

Con cartolinas de cores e unhas tesoiras puxemos a "funcionar" a nosa imaxinación e saíron diferentes combinacións que usaremos como tarxeta de felicitación. 

Nos próximos días traballaremos sobre os textos que poden levar as tarxetas.

Con todos os deseños faremos unha pequena montaxe e nuns días veremos os resultados...

ANIMACIÓN LECTORA

Hoxe divertímonos moito cunha sesión de animación lectora e  contacontos a cargo do actor e director de teatro Manuel Solla Barragáns -que ademáis é de Mourente-. 

Esta actividade chega despois do traballo que realizamos co libro "¡QUÉ ASCO DE BICHOS! UN COCODRILO ENORME" de Roald Dahl publicado por Alfaguara-Santillana, a quen debemos esta animación.

O libro encantounos, fixemos actividades de rimas, de velocidade lectora, de interpretación, de plástica...falamos de "bichería"  -Salón do Libro de Po-, do centenario do nacemento de Roald Dahl neste ano 2016, das coñecidas ilustracións de Quentin Blake, das versións cinematográficas...

Nas fotos recollemos momentos con actividades individuais, por parella, en equipos, tamén de actividades de interpretación, de debuxo, de rima...e rematamos con  MAXIA. Manuel Solla animounos a ser grandes lectoras e lectores, a "gardar palabras", a tratar con respeto os libros e a visitar as nosas bibliotecas

NAMORANDO 2016

Durante os meses de setembro e outubro traballamos as nosas emocións cun proxecto coordinado pola psicóloga Jone Ojeda e promovido pola Consellería de Educación e Igualdade do Concello de Pontevedra. Esta proposta levouse a cabo con alumnado de 4º de primaria e 4º da ESO. Durante sete venres consecutivos falamos, comentamos, debatimos, reflexionamos sobre emocións, discriminación, igualdade...

Dúas nenas e tres nenos dos nosos grupos representaron as nosas clases para axudar nun mural colaborativo e a sesión foi gravada en video. A obra realizouse o día 5 de novembro no CEIP Vidal Portela e podo verse no muro exterior do centro. Con imaxes da realización e reflexións do proxecto confecionouse o seguinte video que achega unha importante mensaxe. Esperamos que vos guste. 

Moitas grazas Jone por todo!!!

OS SERES VIVOS NO SEU MEDIO

Diferenciamos os termos INDIVIDUO-COMUNIDADE-POBOACIÓN-ECOSISTEMA.

25 DE NOVEMBRO -DÍA CONTRA A VIOLENCIA DE XÉNERO-

Estes días traballamos con diferentes textos (conto, xornal, poesía, cómic, cartel...) sobre o maltrato, a discriminación e a violencia de xénero. Escoitamos, falamos, debatimos, reflexionamos sobre un problema que tristemente segue sendo noticia moitos días...Identificamos maltrato físico e maltrato psicolóxico.

 

PRACTICO A DIVISIÓN

Clicando na imaxe seguinte podemos traballar cun programa para practicar divisións:

 No seguinte programa temos catro niveis de división. Ata o nivel 3, as divisións teñen unha cifra no divisor.

Na clase comezamos a practicar a división de dúas cifras no divisor...dentro de moi pouco, completaremos o nivel 4.  
DEBEMOS  PRACTICAR!!!

DÍA INTERNACIONAL DA PALABRA

Hoxe, 23 de novembro, conmemórase o DÍA INTERNACIONAL DA PALABRA. Insistimos na  necesidade do diálogo, como ferramenta fundamental para eliminar toda violencia, concienciar a toda a sociedade de que é a palabra o único camiño cara a unha paz  entre os pobos, sen discriminación de ideas políticas ou relixiosas.

Esta celebración queda en medio de outras dúas datas importantes: 20 de novembro -DÍA INTENACIONAL DOS DEREITOS DA INFANCIA- e 25 de novembro -DÍA CONTRA O MALTRATO DE XÉNERO-. 

As tres datas son motivo de reflexión nas nosas aulas estes días. Falamos de palabra, diálogo, dereitos, igualdade, discriminación, compartir, axudar, colaborar...

LAMPI remitiunos unha carta  moi especial sobre esta celebración. Coa axuda da profe Iria estivemos escollendo unha palabra de cada clase para colocar no souto da biblioteca. 

Buscamos palabras relacionadas coa natureza e co outono, fixémolo individual, por parellas, por equipos e  as máis votadas foron colocadas no tendal da biblioteca xunto coas escollidas no resto dos cursos. Tamén empregamos o dicionario.

Co programa  http://www.wordle.net/create  fixemos nubes de palabras:

Palabras fermosas

Palabras agudas con nomes de animais

DÍA UNIVERSAL DA INFANCIA

20  DE  NOVEMBRO

DÍA UNIVERSAL DOS DEREITOS DA INFANCIA

 

MAGOSTO 2017

Hoxe 11 de novembro, día de San Martiño,  celebramos o noso magosto escolar. Como en cursos anteriores, Paco con axuda do alumnado de sexto asou unhas riquísimas castañas que degustamos ao remate do recreo. 

A festa tivo tamén momentos divertidos de xogos como o da "castaña bomba" e "as castañas petrificadas" que estiveron acompañados de música e a animación da profe Lola.

 

Clicando no seguinte enlace podemos compartir coas familias o video montado pola "profe" Alba Blanco cun percorrido polas actividades da xornada.  

 https://vimeo.com/191582417

OUTONO, OUTONO

Nas últimas sesións de Plástica decoramos unhas follas con tonalidades cálidas e outonais. 

Empregamos cartolina branca, rotulador negro e ceras coas cores precisas. 

Xa rematadas, as follas vestiron de outono as nosas clases e agora presentamos os resultados do noso traballo: